கோயில் விவரம்

இரண்டாயிரம் ஆண்டுகளுக்கு முன் இங்கே வந்த கிரேக்க ஆசிரியர் தாலமி (கி.பி.90-168) என்பவர் இவ்வூரை மல்லியார்பா எனக் குறிப்பிட்டுள்ளார். அந்நாட்களில், இந்நகரம் வணிகம் செழித்து வளர்ந்த நிலையில், மிகவும் புகழ்பெற்ற கடற்கரைப் பட்டினமாக விளங்கியுள்ளது. மேலும் இந்நகரமானது, பண்பாட்டுச் சிறப்பினையும் தன்னகத்தே கொண்டது. உலகப்புகழ்பெற்ற அற இலக்கியமான திருக்குறளை இயற்றிய திருவள்ளுவர் இரண்டாயிரம் ஆண்டுகளுக்கு முன்பு மயிலாப்பூரில் வாழ்ந்தவர். ஏழாம் நூற்றாண்டை சார்ந்த சைவ சமயக் குரவர்களாகிய திருஞானசம்பந்தரும் அப்பரும் இத்திருத்தலத்தைப் பற்றி பாடியுள்ளனர். கி.பி.1566-ல் மயிலாப்பூர் போர்ச்சுகீசியரின் வசம் வீழ்ந்த போது திருக்கோயில் சேதமுற்றது. தற்போதுள்ள திருக்கோயிலானது 300 ஆண்டுகளுக்கு முன்பு மீண்டும் கட்டப்பட்டதாகும்.

தென்னிந்தியாவின் மிகவும் முக்கியத்துவம் வாய்ந்த சைவத்திருத்தலங்களில் ஒன்றான, மயிலை அருள்மிகு கபாலீசுவர் திருக்கோயிலானது தமிழ்நாட்டின் தலைநகரமான சென்னை மாநகரத்தின் மையப் பகுதியில் அமைந்துள்ளது. வெளிநாட்டினர் உள்பட பல்லாயிரக்கணக்கான சுற்றுலாப் பயணிகள் இத்திருக்கோயிலுக்கு ஆண்டுதோறும் வருகை தருகின்றனர். இத்திருக்கோயிலின் இறைவன் அருள்மிகு கபாலீசுவரர், இறைவி அருள்மிகு கற்பகாம்பாள் இது நெடிதுயர்ந்த கோபுரத்தைக் கொண்ட அழகான திருக்கோயிலாகும். இது கிழக்குப் புறத்தில் நெடிதுயர்ந்த கோபுரத்தையும் மேற்றிசையில் பெரிய திருக்குளத்தையும் கொண்ட அழகிய திருக்கோயிலாகும். திருக்கோயிலும் திருக்குளமும் நான்கு புறங்களிலும் அகன்ற மாடவீதிகளால் சூழப்பட்டுள்ளன. திருக்கோயில் மற்றும் திருக்குளத்தின் அழகிய காட்சியை அருகிலுள்ள படத்தில் காணலாம். மயிலாப்பூர் கடற்கரையில் இருந்து அரை மைல் தொலைவில் அடர்த்தியான குடியிருப்பு பகுதியின் நடுவே அமைந்துள்ளது.