தீ நட்பு

811

பருகுவார் போலினும், பண்பு இலார் கேண்மை

பெருகலின் குன்றல் இனிது.

812

உறின் நட்டு, அறின் ஒரூஉம் ஒப்பு இலார் கேண்மை

பெறினும், இழப்பினும், என்?.

813

உறுவது சீர்தூக்கும் நட்பும், பெறுவது

கொள்வாரும், கள்வரும் நேர்.

814

அமரகத்து ஆற்றறுக்கும் கல்லா மா அன்னார்

தமரின், தனிமை தலை.

815

செய்து ஏமம் சாரா, சிறியவர் புன் கேண்மை

எய்தலின் எய்தாமை நன்று.

816

பேதை பெருங் கெழீஇ நட்பின், அறிவு உடையார்

ஏதின்மை கோடி உறும்.

817

நகை வகையர் ஆகிய நட்பின், பகைவரான்

பத்து அடுத்த கோடி உறும்.

818

ஒல்லும் கருமம் உடற்றுபவர் கேண்மை

சொல்லாடார், சோரவிடல்!.

819

கனவினும் இன்னாது மன்னோ-வினை வேறு

சொல் வேறு பட்டார் தொடர்பு!.

820

எனைத்தும் குறுகுதல் ஓம்பல்-மனைக் கெழீஇ,

மன்றில் பழிப்பார் தொடர்பு!.