நட்பு

781

செயற்கு அரிய யா உள, நட்பின்?-அதுபோல்

வினைக்கு அரிய யா உள, காப்பு?.

782

நிறை நீர, நீரவர் கேண்மை, பிறை; மதிப்

பின் நீர, பேதையார் நட்பு.

783

நவில்தொறும் நூல் நயம் போலும்-பயில்தொறும்,

பண்பு உடையாளர் தொடர்பு.

784

நகுதற்பொருட்டு அன்று, நட்டல்; மிகுதிக்கண்

மேற்சென்று இடித்தற்பொருட்டு.

785

புணர்ச்சி, பழகுதல் வேண்டா; உணர்ச்சிதான்

நட்பு ஆம் கிழமை தரும்.

786

முகம் நக, நட்பது நட்பு அன்று; நெஞ்சத்து

அகம் நக, நட்பது-நட்பு.

787

அழிவினவை நீக்கி, ஆறு உய்த்து, அழிவின்கண்

அல்லல் உழப்பது ஆம்-நட்பு.

788

உடுக்கை இழந்தவன் கை போல, ஆங்கே

இடுக்கண் களைவது ஆம்-நட்பு.

789

'நட்பிற்கு வீற்றிருக்கை யாது?' எனின், கொட்பு இன்றி

ஒல்லும்வாய் ஊன்றும் நிலை.

790

'இனையர், இவர் எமக்கு; இன்னம் யாம்' என்று

புனையினும், புல்லென்னும்-நட்பு.