தூது

    681

அன்பு உடைமை, ஆன்ற குடிப்பிறத்தல், வேந்து அவாம்

பண்பு உடைமை,- தூது உரைப்பான் பண்பு.

   682

அன்பு, அறிவு, ஆராய்ந்த சொல்வன்மை-தூது உரைப்பார்க்கு

இன்றியமையாத மூன்று.

   683

நூலாருள் நூல் வல்லன் ஆகுதல்-வேலாருள்

வென்றி வினை உரைப்பான் பண்பு.

   684

அறிவு, உரு, ஆராய்ந்த கல்வி, இம் மூன்றன்

செறிவு உடையான் செல்க, வினைக்கு.

   685

தொகச் சொல்லி, தூவாத நீக்கி, நகச் சொல்லி,

நன்றி பயப்பது ஆம்-தூது.

   686

கற்று, கண் அஞ்சான், செலச் சொல்லி, காலத்தால்

தக்கது அறிவது ஆம்-தூது.

   687

கடன் அறிந்து, காலம் கருதி, இடன் அறிந்து,

எண்ணி, உரைப்பான் தலை.

   688

தூய்மை, துணைமை, துணிவு உடைமை, இம் மூன்றின்

வாய்மை-வழி உரைப்பான் பண்பு.

   689

விடு மாற்றம் வேந்தர்க்கு உரைப்பான்-வடு மாற்றம்

வாய் சோரா வன்கணவன்.

   690

இறுதி பயப்பினும், எஞ்சாது, இறைவற்கு

உறுதி பயப்பது ஆம்-தூது.