தெரிந்து தெளிதல்

        501

அறம், பொருள், இன்பம், உயிர் அச்சம், நான்கின்

திறம் தெரிந்து தேறப்படும்.

        502

குடிப் பிறந்து, குற்றத்தின் நீங்கி, வடுப் பரியும்

நாண் உடையான்கட்டே தெளிவு.

        503

அரிய கற்று, ஆசு அற்றார்கண்ணும், தெரியுங்கால்

இன்மை அரிதே, வெளிறு.

        504

குணம் நாடி, குற்றமும் நாடி, அவற்றுள்

மிகை நாடி, மிக்க கொளல்!.

        505

பெருமைக்கும், ஏனைச் சிறுமைக்கும், தத்தம்

கருமமே கட்டளைக் கல்.

        506

அற்றாரைத் தேறுதல் ஓம்புக; மற்று அவர்

பற்று இலர்; நாணார் பழி.

        507

காதன்மை கந்தா, அறிவு அறியார்த் தேறுதல்

பேதைமை எல்லாம் தரும்.

        508

தேரான், பிறனைத் தெளிந்தான் வழிமுறை

தீரா இடும்பை தரும்.

        509

தேறற்க யாரையும், தேராது; தேர்ந்த பின்,

தேறுக, தேறும் பொருள்.

        510

தேரான் தெளிவும், தெளிந்தான்கண் ஐயுறவும்,

தீரா இடும்பை தரும்.