சிற்றினம் சேராமை

         451

சிற்றினம் அஞ்சும், பெருமை; சிறுமைதான்

சுற்றமாச் சூழ்ந்துவிடும்.

         452

நிலத்து இயல்பான் நீர் திரிந்து, அற்று ஆகும்;- மாந்தர்க்கு

‘இனத்து’ இயல்பது ஆகும், அறிவு.

         453

மனத்தான் ஆம், மாந்தர்க்கு உணர்ச்சி; இனத்தான் ஆம்,

‘இன்னான்’ எனப்படும் சொல்.

         454

மனத்து உளது போலக் காட்டி, ஒருவற்கு

இனத்து உளது ஆகும்-அறிவு.

         455

மனம் தூய்மை, செய்வினை தூய்மை, இரண்டும்

இனம் தூய்மை தூவா வரும்.

         456

மனம் தூயார்க்கு எச்சம் நன்று ஆகும்; இனம் தூயார்க்கு

இல்லை, நன்று ஆகா வினை.

         457

மன நலம் மன் உயிர்க்கு ஆக்கம்; இன நலம்

எல்லாப் புகழும் தரும்.

         458

மன நலம் நன்கு உடையர் ஆயினும், சான்றோர்க்கு

இன நலம் ஏமாப்பு உடைத்து.

         459

மன நலத்தின் ஆகும், மறுமை; மற்று அஃதும்

இன நலத்தின் ஏமாப்பு உடைத்து.

         460

நல் இனத்தின் ஊங்கும் துணை இல்லை; தீ இனத்தின்

அல்லற்படுப்பதூஉம் இல்.