அறிவுடைமை

            421

அறிவு, அற்றம் காக்கும் கருவி; செறுவார்க்கும்

உள் அழிக்கல் ஆகா அரண்.

            422

சென்ற இடத்தால் செலவிடா, தீது ஒரீஇ,

நன்றின் பால் உய்ப்பது-அறிவு.

            423

எப் பொருள் யார் யார் வாய்க் கேட்பினும், அப் பொருள்

மெய்ப் பொருள் காண்பது-அறிவு.

            424

எண் பொருளவாகச் செலச் சொல்லி, தான் பிறர்வாய்

நுண் பொருள் காண்பது-அறிவு.

            425

உலகம் தழீஇயது ஒட்பம்; மலர்தலும்

கூம்பலும் இல்லது-அறிவு.

             426

எவ்வது உறைவது உலகம், உலகத்தொடு

அவ்வது உறைவது-அறிவு.

             427

அறிவு உடையார் ஆவது அறிவார்; அறிவு இலார்

அஃது அறிகல்லாதவர்.

             428

அஞ்சுவது அஞ்சாமை பேதைமை; அஞ்சுவது

அஞ்சல், அறிவார் தொழில்.

             429

எதிரதாக் காக்கும் அறிவினார்க்கு இல்லை-

அதிர வருவதோர் நோய்.

              430

அறிவு உடையார் எல்லாம் உடையார்; அறிவு இலார்

என் உடையரேனும் இலர்.